Aktuelt

Vestnorsk-estisk samarbeid for å jobbe mot vald i nære relasjonar

Ingen kommentarer
Vestnorsk-estisk samarbeid for å jobbe mot vald i nære relasjonar

RVTS Vest er ein av aktørane i eit prosjekt som blant anna går ut på å redusere kjønnsbasert vald i Estland.

Dette skal gjerast ved å utvikle tenester for offer for vald i nære relasjonar.  Samstundes skal ein styrke samarbeidet mellom ulike institusjonar og auke medvitet blant ofre og grupper av spesialistar.

Prosjektet, som heiter Domestic and Gender-based Violence er initiert av Helsedirektoratet, i samarbeid med Estonian Ministry of Social Affairs.

Nyleg hadde vi studiebesøk av ein delegasjon frå Estland som er med i dette prosjektet. Dei kom frå ulike tenester i Estland, som anten jobbar mot eller forskar på vald i nære relasjonar. Orsaka til Noregbesøket var at dei vil lære meir om korleis arbeidet mot vald i nære relasjonar er organisert i Noreg. I Estland skal RVTS Vest gi opplæring til ulike delar av tenesteapparatet, kring korleis jobbe tverrfagleg mot vald i nære relasjonar.

Besøk frå Estland.
Espen R. Johansson, Reidun Dybsland og Venke A. Johansen saman med den estiske delegasjonen.

Målet med prosjektet er å utjamne sosiale og økonomiske forskjellar i Europa, og dessutan styrke det bilaterale samarbeidet mellom Noreg og Estland.

Prosjektet er ein del av EEA Grants.

Bakgrunn
Til tross for den estiske regjeringa sitt engasjement og bekymring, er kjønnsbasert vald og menneskehandel framleis ei utfordring for det estiske samfunnet. Vald i nære relasjonar er utbredt, men har ein tendens til å bli gløymd, og mangel på fagkunnskap og forskning på feltet begrensar staten sin mulighet til å takle problemet effektivt (Trafficking in Persons Report 2012).

Les meir om prosjektet: Domestic and Gender-based Violence