Relasjonar, kommunikasjon og samspel kan by på utfordringar for dei fleste av oss i arbeidskvardagen. Dette kan vere ekstra utfordrande, og samtidig avgjerande når vi må handtere kritiske hendingar.

Kriseleiing inneber to sentrale utfordringar; 1) konsekvensane av sjølve hendinga(ne) i samspel med avgjerdene som vert fatta, og 2) møtet med sterke emosjonar.

Å ta avgjerder under ei pågåande krise har ofte større konsekvensar enn i normalsituasjonar. Kvaliteten på kriseleiing blei faktisk sett på som meir avgjerande enn mangel på ressursar, behov for ny lovgjevnad, organisering eller store verdival etter 22-juli terroren (Gjørvkommisjonen).  Ein dyktig leiar er oppteken av å etablere tillit, gode relasjonar og samspel, både før og etter krisa, for å lykkast med det mellommenneskelege leiarskapet under krisa aukar.

Leiarskap under ei krise stiller store krav til deg som leiar. Det gjeld handtering av ein uoversiktleg situasjon, møtet med eit stort spekter av emosjonar både hos dei ramma og hjelparane gjerne kombinert med  pågåande nyheitsmedia. Kva med dine eigne følelsar og reaksjonar i ein slik samanheng, korleis handterer du det?

Psykososial kompetanse er ein avgjerande faktor i all krisehandtering. Vi tilbyr eit program for leiarar der det mellommenneskelege perspektivet og relasjonar er ei sentral målsetting. Førebuing, både mentalt og praktisk, er avgjerande når det kjem til krisehandtering. Deltakarane i programmet får moglegheit til å lære seg sjølv betre å kjenne innanfor trygge rammer. Dette skjer ved leiartrening både i plenum og i grupper. Det blir lagt vekt på leiarrolla under kriser, stresshandtering, situasjonsforståing, kommunikasjon, samhandling og personleg utvikling.

I den siste samlinga av programmet er planlegging og gjennomføring av øvingar eit sentralt tema. Opplæringa inkluderer også handtering av både tradisjonelle og sosiale medium.

Programmet medverkar til auka psykososial kompetanse hos personar med leiarfunksjonar ved kriser og katastrofar i organisasjonar. Det vil også kunne bidra til betre teamfunksjon og auka samarbeid mellom involverte instansar. Leiarar frå ulike etatar får anledning til auka forståing for dei einskilde aktørane si rolle og funksjon ved kriser og katastrofar, og slik betre samarbeid både internt og på tvers av tenester og profesjonar.

Vanskegrad og krav til gjennomføring av trening og øvingar blir lagt på eit nivå som gir både positiv erfaring og utfordringar. Både meistring og forbetringselement blir vektlagt i tilbakemeldingsprosessen. Deltaking gir høve til etablering av eit fagleg nettverk mellom deltakarar etter at programmet er gjennomført.

Forsking og erfaring viser at fellestrekk hos dyktige kriseleiarar er ei oppgåveorientert prioritering, kombinert med ei trygg og ærleg (autentisk) leiarstil (Nesse, 2017). Ein robust personlegheit kan også vere ein viktig føresetnad for å gjere ein god jobb som kriseleiar. Likevel, det viktigaste er trening, både under reelle hendingar og øvingar, for å bygge kompetanse og erfaring. Når det verkeleg skjer, så gjer dette ein vesentleg skilnad.

Ide og innhald i leiarprogrammet vart gjennomgått og drøfta med erfarne leiarar frå ulike relevante instansar (kriseteam, politi og forsvaret) samt anerkjente forskarar på fagfeltet. Programmet vart fyrst gjennomført frå februar 2023 til februar 2024. Tilbakemeldinga frå deltakarane var svært positiv, noko som var ein viktig faktor for avgjerda om å tilby det ein gong til.