Aktuelt
Tidleg oppdaging av utsette barn og unge
Foto: Alexander Dummer; Unsplash
Ny nasjonal fagleg retningslinje for tidleg oppdaging av utsette barn og unge.
Målet med retningslinja er å styrke oppdagar- og handlingskompetansen hos leiarar og tilsette i kommunen. Den rettar seg mot alle barn og unge, med mål om å nå dei utsette.
Arbeidet med retningslinja har hatt ei brei samansett referansegruppe med representantar frå brukarar, kommunar, kompetanse- og forskningsmiljø for å sikre ei god forankring. RVTS Vest er eitt av kompetansesentra som har bidrege med faglege råd.
– Vi veit at det er mange born og unge som lever med vald, seksuelle overgrep og omsorgssvikt, seier Linda Kvalvik frå RVTS Vest. – Det er avgjerande at tilsette i alle tenester som møter barn og unge, både har kunnskap om korleis dette kan kome til uttrykk, men ikkje minst tryggleik til å handle når dei er bekymra for born dei møter. Retninglinja skal vere eit bidrag i dette arbeidet og gir klare anbefalingar og råd, både til leiing og tilsette i kommunane.
F.v: Psykologspesialist Cathrine Eide og barnevernpedagog Linda Kvalvik har vore våre representantar i arbeidet med retningslinja.
Ellen Margrethe Carlsen, avdelingsdirektør i Helsedirektoratet, seier at noko av det viktigaste med den nye retningslinja er å sette ulike sektorar i stand til å jobbe saman for å sjå heile barnet og avdekke samansette behov for støtte.
Retningslinja har sju anbefalingar kor:
- Tre anbefalingar er knytt til kommunen sitt ansvar i tidleg oppdaging av utsette barn og unge og deira foreldre.
- Fire anbefalingar er knytt til tilsette sitt ansvar frå kunnskap til handling i arbeidet med utsette barn og unge og deira foreldre.
Les retningslinja på Helsedirektoratet si nettside.
Kjelde: Sammen om tidlig oppdagelse av utsatte barn og unge (Helsedirektoratet)