Aktuelt
Skal spørje gravide om vald
- 27/03/2015
- Av: RVTS Vest
- Kategori: Aktuelt Førebygging Psykisk helse Utviklingstraumer Vold
Bergen kommune og RVTS Vest samarbeidar om kompetanseheving for alle jordmødre i kommunen.
Nasjonal retningsline for svangerskapsomsorgen pålegger alle jordmødre å spørje den gravide om vald. Bergen kommune ynskjer å gi sine jordmødre både kompetanse på vald, samt tryggheit til å spørje om vald. Gjennom fleire fagdagar, samt rettleiing, skal jordmordtenesta styrkjast.
– Det er nyttig å vere grundig. Det å vite kva som er vald gir ein god grunnlagsforståing som vi tek med oss i møte med den gravide, seier Hilde Rogde, jordmor ved Nesttun helsestasjon. – Det at alle jordmødrene deltek på same opplæring, gir eit felles fokus og ein felles forståing som igjen gjer det lettare å bistå og støtte kvarandre i arbeidet.
Ingrid Lid Nordø er jordmor ved Sandsli helsestasjon. Ho framhevar at det å få kompetanse på vald og konsekvensar av vald er viktig. Det er eit vanskeleg tema og det krev mot og styrke å gå inn i dette, både for jordmor og for den utsette kvinna. Det er viktig å trene på korleis spørje på ein god og ivaretakande måte.
Begge seier at ein veit at vald mot gravide skjer. Det er viktig for den gravide og det ufødte barnet si helse å avdekke vald, slik at forholda er optimale for den lille i magen. Det å spørje om vald og å avdekke vald gir moglegheit for å forebygge. Ein felles kompetanseheving aukar motivasjonen og tryggheita til å ha med denne problemstillinga i møte med gravide.
Linda R. Kvalvik og Geir J. Olsen i fagteam vald og seksuelle overgrep er ansvarleg for undervisninga.